訪港為世盃造勢　基拔圖施華：巴西非奪冠大熱

基拔圖施華承認巴西非奪冠大熱。（李浚湣攝）

1/4

基拔圖施華再次訪港。（李浚湣攝）

2/4

基拔圖施華接受傳媒圍訪。（李浚湣攝）

3/4

基拔圖施華（右）與巴貝利合照。（李浚湣攝）

4/4

2026年世盃早前已經完成抽籤，而官方大中華區門票銷售代理商周四（11日），便成功邀請到曾征戰3屆世盃的名宿基拔圖施華來港，接受傳媒圍訪兼造勢。其中這名49歲前巴西防守中場，賽前特意為「森巴軍團」減壓，承認球隊仍處於磨合階段，並非今屆冠軍大熱。

巴西在2026世盃被抽入C組，同組對手包括蘇格蘭、摩洛哥和海地，名宿基拔圖施華相信出線問題不大：「抽籤結果還好，幾隊都唔算太難應付。始終巴西陣中攞有好多出色球員，只係仲要啲時間磨合，祝願新帥安察洛堤好運。」不過，基拔圖施華卻認為「森巴軍團」，要相隔24年再奪冠並非易事：「衞冕冠軍阿根廷、法國、葡萄牙同西班牙實力都好強，巴西今屆稱唔上冠軍大熱。但正如2002年嗰屆一樣，賽前冇人估到我哋會捧盃，希望球員喺冇咩壓力之下，可以集中精神比賽，爭取踢出好表現。」

同時，球員年代曾效力阿仙奴多年的基拔圖施華，又稱看好目前身處聯賽榜首的「兵工廠」，能夠贏得英超冠軍：「阿仙奴今年好有機會捧盃，球隊與以往唔同，陣容好有深度，亦冇受太大傷兵問題困擾。雖然上場聯賽不敵阿士東維拉，希望士氣唔好受太大影響，眾將可以盡快收拾心情。」此外，提到利物浦球星沙拿早前因不滿被貶後備，與領隊施洛發生衝突，基拔圖施華亦有分享其想法：「我明白沙拿好大壓力同唔開心，一名優秀球員當然渴望落場作出貢獻，尤其球隊成績未符預期。但當向傳媒公開抱怨，事情就會一發不可收拾，我嘅做法係同沙拿相反，會私底下同教練商討先。」